@ 
唔少樓齡較高嘅樓宇，大廈管理未必完善，而且唔少住客都係長者，所以呢類物業嘅消防安全都值得關注。
近日，北區民政處聯同香港消防處新界北總區、北區防火委員會同埋聯和墟關愛隊，去咗粉嶺聯和墟嘅舊樓做家訪同向住戶派發「防火三寶」套裝，提升住戶嘅防火意識。
乜嘢係「防火三寶」呢？就係小型滅火筒、滅火氈同埋獨立火警偵測器喇！小型滅火筒體積只係比殺蟲水大少少，防火氈就可以掛喺廚房備用，而獨立火警偵測器就可以免打孔裝喺牆上或天花板，即裝即用，當偵測到火警時會發出警報提示住客。防火三寶嘅奧妙之處，就係可以藏於民居之中，垂手可得，用嚟撲滅小火或者提醒住客逃生！
喺活動當日，北區民政專員賴子堅、消防處新界北總區指揮官黃宏亮、北區防火委員會主席李聖潑同副主席楊文聰、北區消防安全大使名譽會長會主席彭振聲，同埋聯和墟關愛隊隊長曾興隆，就聯同消防員義工同關愛隊隊員，帶住「防火三寶」套裝上樓探訪住戶。除咗送上三寶外，亦向住客講解三寶嘅用法同埋「應急三識」，即係識滅火、識自救同識逃生，型男消防義工仲即場幫住戶安裝獨立火警偵測器。
@ 