@ 
大埔區青年網絡長跑隊「青年大埔跑Running Team」今年2月組成，由合資格教練帶領，透過有系統長跑訓練提升成員跑步同運動科學嘅知識，一齊跑得更快更遠！成立半年，跑團人數持續攀升，已有超過30位活躍成員。大家對運動嘅熱誠亦有增無減，無論炎夏或雨天都堅持訓練，十分熱血！團隊無懼挑戰，超越自己，就係大埔青網嘅精神！
大埔民政專員陳巧敏聯同青年發展及公民教育委員會青年交流工作小組召集人吳彬彬、大埔青網副主席葉俊傑、海陸空青年義工團召集人張育文及青年領袖工作小組召集人梁中明一齊接受長跑訓練。多名積極參與跑團活動及表現卓越嘅長跑隊成員，更榮獲雄彬慈善基金及運動電子產品品牌贊助最新運動心率手錶乙枚，協助成員掌握訓練時嘅身體狀況同跑步數據，大大提升訓練質素。
大青長跑隊成員更有機會參與區內不同賽事，例如11月份舉行嘅大埔半馬同2025年渣打馬拉松，將所學知識喺賽事中實踐。成員早前更勇奪離島區長跑賽十八區聯會盃總冠軍佳績，可喜可賀！
