@ 
深水埗民政處一直致力同區內法團及業戶保持密切聯繫，積極推廣良好嘅大廈管理 。民政處喺12月舉辦咗一連串大廈管理活動及講座，涵蓋法團帳目管理、採購安排、大廈保安及清潔，以及《競爭條例》與避免反競爭行為等課題。
民政處走入社區，喺區內私人大廈屋苑進行宣傳，向法團委員及業戶介紹《2024年建築物管理（修訂）條例》。參加者除咗可以拎到民政總署最新出版嘅大廈管理刊物，仲有精美紀念品！好多參加者都話活動內容貼心又實用，讓佢哋對日常大廈管理工作更有信心！
有關《競爭條例》講座同樣受業戶歡迎！民政處特別邀請咗競爭事務委員會代表擔任講者，深入淺出講解法例要點，並剖析圍標個案，大家聽得投入之餘，更加喺問答環節積極發問，互相交流管理經驗，氣氛相當熱烈。
未來，深水埗民政處會繼續喺區內舉辦大廈管理活動同講座，加強推廣實用嘅大廈管理知識，並會繼續同各持份者、法團、業戶齊心協力，共同提升區內大廈管理質素，攜手打造一個更安全、更舒適、更宜居嘅深水埗！
