@ 
沙田九約太平清醮係具有數百年深厚歷史同文化意義嘅傳統盛事。醮會起源於「九約」（即九個分區）嘅村民感謝車公大元帥成功庇佑沙田地區免受流行疫症侵襲，決定每十年舉行一次太平清醮，透過設壇誦經、舉行祭祀儀式同神功戲等活動，為社區祈福，祝願沙田區風調雨順、四境平安。
今年係沙田九約繼2015年後再次舉辦太平清醮。沙田九約乙巳年太平清醮「啟壇解禳」儀式上星期六(13/12) 喺沙田牛皮沙街遊樂場隆重舉行，為醮會揭開序幕。中聯辦新界工作部部長羅建君、民政及青年事務局副局長梁宏正，以及沙田民政專員余懷誠等嘉賓亦有出席主禮，誠心上香，共同為社區祈願，場面莊嚴而隆重，寓意街坊同心、社區和諧。
今屆太平清醮為期四日五夜（13-18/12），活動內容豐富。其中亮點包括16/12舉行嘅「正醮日」，各村村民齊集賀醮，並張貼「人緣榜」祈得神靈庇佑；以及17/12晚上舉行嘅「大士出巡」、「祭大幽」及「化大士」等傳統儀式，向幽魂施食、行超渡之禮，場面莊嚴隆重，亦展現善念流傳。整個醮會不單彰顯傳統文化嘅承傳，更凝聚咗社區嘅情誼同歸屬感。
感謝沙田鄉事委員會、沙田九約建醮委員會，以及各界人士同心協力，令沙田乙巳年太平清醮得以圓滿舉行！一齊期待下次再相聚，共同延續呢份珍貴嘅民間文化傳統。
@ 