@ 
又係深duck記者出場嘅時候喇！深水埗區獨特而人情味濃厚嘅社區文化，一直連繫香港人，吸引好多遊客慕名而來，甚至喺唔少國際同香港電影中，都睇到深水埗嘅蹤影。
民政專員黃昕然、兩位助理專員及幾位青年大使日前（14/8）為遠道而嚟參賽嘅美國U20女子棍網隊 及港隊成員一展好客之道，親身做導遊 ，帶一班運動員展開尋「埗」之旅，嚟一場三小時嘅「深」度遊體驗。
五十幾位成員兵分三路，分別去咗鴨寮街牌檔區搵心水貨品 ，喺北河街一帶街市感受街坊平日樸實忙碌嘅生活文化，仲去咗充滿懷舊特色嘅香港文化雜貨屋 ，睇吓黑膠唱片 、中古相機 、舊式幻燈片 等，見證數代香港人嘅集體回憶 。
當然唔少得去試埋深水埗價廉物美、深受本地人歡迎嘅米芝蓮平民小食 。除咗帶佢哋捐窿捐罅尋寶發掘美食外，幾位導遊沿路仲同運動員分享區內歷史故事及街坊生活趣聞等。
深水埗因新舊交錯而交織出獨有嘅文青空間。隊員於是又去咗Colour Brown café 及Bridge+人文藝術空間，參觀關於寵物同畫法嘅展覽。
最後，中華藝興協辦咗交流活動，包括 長衫試穿環節同壓花團扇手作坊 ，畀隊員感受中華文化。一班來自青途嘅小小運動員 幫手用壓乾花裝飾紙扇 ，個個都精靈可愛！
一班運動員著住長衫 、拎住圍扇興奮咁打卡 ，真係似模似樣！
立法會議員鄭泳舜亦有出席，勉勵各位繼續努力，爭取喺四年後嘅奧運場上出戰 。今次U20錦標賽首次落戶亞洲 ，由中國香港棍網球總會主辦。希望一眾運動員喺深水埗深度遊以及接下來嘅賽事都滿載而歸。
