@ 
一年一度嘅「齊『深』滅罪體育嘉年華@深水埗區」前日(11/1)喺長沙灣遊樂場圓滿舉行！
今年嘅活動內容豐富，仲新增咗多項創新元素，包括展示劍齒虎裝甲車、安全社區體驗館流動車、無人機同各類槍械，亦有仿製毒品氣味體驗攤位同警犬表演等。場內仲設有法式滾球同軟藤球等新興運動攤位，加上八拍武術及地區團體嘅音樂表演。嘉年華總共吸引超過5000位市民參與，氣氛好熱鬧啊！
市民透過參與互動遊戲攤位，可以輕鬆學到防罪、防騙、禁毒同維護國家安全相關嘅實用資訊，仲可以將呢啲正面信息分享畀親朋戚友，齊心建設更安全嘅社區。
開幕典禮特別邀請到香港賽艇運動員趙顯臻擔任活動「滅罪之星」，同大家分享佢嘅奮鬥經歷，同埋點樣透過運動釋放壓力、遠離罪惡同毒品誘惑。參加者聽得好投入，大家都話要主動向誘惑說「不」！
中聯辦九龍工作部副處長簡德金、深水埗體育會創會主席暨首席永遠榮譽會長陳東、保安局禁毒處禁毒專員李基舜、警務處西九龍總區指揮官吳樂俊、深水埗民政專員王浩宇，以及深水埗區撲滅罪行委員會主席盧永文等都有到場擔任主禮嘉賓。
