@ 
尋日（13/1），九龍城區議會舉行咗2026年度第一次會議，討論多項關於社區發展同民生改善嘅重要議題，包括位於啟德發展區嘅新急症醫院項目進度、馬頭圍邨重建計劃、區內老舊水管維修安排、 啟德郵輪碼頭招標安排等。
其中，就馬頭圍邨重建計劃，區議員歡迎房屋署將新美東邨納入遷置資源，令重建期數由三期縮減到兩期，居民可以更快搬入新屋，享受更優質嘅生活環境。會上亦都有多位議員提出，希望房屋署可以同居民保持緊密溝通、彈性處理居民訴求，尤其加強支援邨內長者住戶，協助佢哋順利過渡到新環境。
另外，九龍城區議會主席蔣志豪宣布成立 「大廈管理工作小組」，由關浩洋議員出任主席，專門負責推動區內大廈管理事宜；並且將 「提振地區經濟專責工作小組」 任期延長一年，持續推動地區經濟活力。
呢個月，區議會唔只開會，亦都有走入社區，聆聽市民嘅意見。1月份嘅「流動會客室」由劉婉燕、陳治華、吳奮金、左滙雄四位區議員當值，各位區議員親自走到梭椏道街頭，同市民面對面交流。
相信，只有持續開放議政、深入聆聽，先能夠真切回應市民嘅需要。九龍城區議會未來會繼續以實幹同貼地嘅作風，跟進各項議題，同居民一齊建設更美好嘅九龍城！
@ 