@ 
中西區民政處星期六（17/1）喺西營盤社區會堂舉辦「弘國粹·迎馬年 — 中西區毛筆書法及揮春工作坊」，鼓勵中西區青年人及學生勤練書法，陶冶性情，專注當下，培養對中華文化藝術嘅興趣。現場吸引咗近60名青年、學生、小朋友同家長到場大展身手，當中仲有8名5歲小朋友第一次用毛筆寫字。
工作坊由中國書法家協會會員、中國書協香港分會理事陳偉泉擔任導師，參加者首先學習正確手握毛筆嘅方法同坐姿，然後簡要了解書法文化，再練習書寫筆劃較少嘅中文字，以掌握基本筆劃結構同落筆力度。喺導師嘅從旁指導下，參加者都越嚟越熟練，越嚟越得心應手，喺短時間内已經有明顯進步同成果，仲開始領會到中華藝術之美！
農曆新年將至，大家齊齊學寫揮春。除咗手寫正宗嘅書法外，參加者都即席發揮創意，畫上唔同圖案裝飾，設計出獨一無二嘅揮春。參加者都好高興可以學習正宗毛筆書法同樂趣，又可以將靚靚嘅揮春帶返屋企，同屋企人一齊共賀新歲！
@ 
@