@ 
上周末(17-18/1)，紅磡社區會堂充滿暖意，由建設健康九龍城協會與九龍城民政處攜手舉辦嘅「九龍城醫護同心顯關懷」活動圓滿結束。
當日衞生署署長林文健、九龍城民政專員蔣志豪、中聯辦九龍工作部副處長林嘉興、九龍城及油尖旺區福利專員林綺梅，以及九龍城警區指揮官陳少鳴皆親臨主禮，加上一眾醫護義工同善心機構，陣容十分鼎盛。
呢次活動集結咗26位專科醫生、37位護士及10位藥劑師，一連兩日為街坊提供免費專科諮詢，涵蓋老人科、眼科、耳鼻喉科、精神科同埋皮膚科，全方位照顧唔同年齡層嘅健康需要。
現場除咗醫生問診，亦設有健康檢測站，為市民量度血壓、血糖、血含氧量等各項指數，仲有藥劑師即場指導用藥知識。希望透過呢次活動，提醒各位街坊同老友記，平時要多啲留意身體情況，建立健康嘅生活模式。
特別感謝各位醫護義工同善心機構嘅無私奉獻，活動先能夠順利舉行。將來，九龍城民政處會持續與夥伴機構合作，為九龍城區居民舉辦唔同活動，持續關顧市民嘅身心健康。
