@ 
上星期二（20/1），香港潮人文藝協會聯同廣東潮劇院嚟到紅磡社區會堂舉辦「九龍城區鑼鼓聲響迎新年潮劇文藝表演」，邀請咗九龍城民政專員蔣志豪蒞臨主禮，喺精湛嘅潮劇藝術中同九龍城區街坊一齊迎接新年！
當日上演咗《呂布與貂蟬》、《穆桂英招親》、《蘆林會》等多個經典潮劇選段，演員唱、念、做、打，動作靈活，感情細膩，配上清脆洪亮嘅大鑼鼓聲，展現出潮劇藝術嘅獨特魅力。觀賞表演嘅街坊都享受其中，掌聲同歡呼聲不斷。
九龍城區素有「小潮州」之稱，今次活動正正體現咗香港同潮汕之間嘅緊密聯繫，促進文化交流。蔣專員亦表示欣賞潮汕傳統美食同文化，鼓勵香港潮人文藝協會繼續努力傳承潮汕文化。
未來，期望九龍城區有更多各類型嘅潮汕文化活動，讓街坊鄉親感受到潮汕文化嘅獨特魅力。
