@ 
觀塘民政處為區內青年網絡樂觀派舉辦「生涯發展及職業體驗計劃2024」。計劃同各大公司及機構合作 舉辦一系列嘅影子體驗、職業實習計劃，畀學員認識唔同行業嘅工作崗位同職責 ，體驗真實工作環境 。
除咗之前同大家分享過嘅民政處以及港鐵體驗活動，等我哋一齊睇下一眾樂觀派同學仔最近仲參與咗嘅活動啦
建設（亞洲）銀行影子體驗日
44位學員喺15/8去到中國建設銀行中心參加工作坊。觀塘民政專員何立基於致辭時表示，期望各位同學積極參與活動，把握呢個喺大型企業體驗嘅良機 ，擴闊自己嘅眼界視野 ，裝備好自己 ，將來一展所長為社會服務。
喺一整日嘅體驗中，學員仲參與咗模擬銀行體驗，扮演櫃檯員工，並喺建行代表嘅指導下一齊參與「Smart理財321桌上遊戲大比併」 ，大家玩得好投入之餘，亦喺比賽嘅過程中學到好多理財知識 。
建行（亞洲）代表亦向同學介紹銀行業嘅未來發展同趨勢，包括央行數字貨幣 、中國建設銀行（亞洲）Innovation Lab及銀行人工智能 等，内容緊貼最新嘅科技發展，啟發同學思考新時代嘅行業環境 。
中國銀行影子體驗日
10位學員喺8/8參觀咗中國銀行大廈同中銀大廈總行，由職員講解中國銀行嘅發展歷史 以及銀行業與香港經濟及社會嘅關係 。同學仲去咗分行進行影子體驗，近距離觀察唔同崗位嘅銀行從業員，了解佢哋嘅日常工作 。
城巴影子體驗日
9位學員亦喺16/8到訪城巴 。除咗有城巴代表簡介公司運作，同學亦把握機會參觀創富道車廠 ，認識車廠嘅先進設施 ，了解巴士日常需要進行嘅維修檢驗工作 。
同一日，學員亦著住制服搭車去到堅尼地城卑路乍灣總站，協助舉行城巴45周年地區活動 ，負責同乘客互動、派發紀念品 ，同學們都好用心咁完成職務 。
