@ 
暑假眨吓眼就快完，大家有咩難忘回憶呢？
20名嚟自多屆屯門「成功有約」同學會嘅團員喺8月14至18日參加咗由屯門民政處、屯門區青年發展及公民教育委員會及「成功有約」同學會合辦嘅天津交流團。喺委員Leo同屯門民政處代表帶領下一齊到天津，希望透過行程增進對國情及中華文化嘅認識同體驗，感受國家嘅快速發展同無限機遇，擴闊個人視野，並建立新友誼。
5日嘅行程包括參觀中國民航大學及天津大學，除咗同當地學生交流學習及分享心得外，仲一齊喺大學飯堂食飯，體驗當地大學生生活之餘，仲可以喺輕鬆嘅環境進行深度交談。
另外，佢哋亦參觀咗無人機同乳業公司兩間當地企業，睇吓國家創新科技同民生企業嘅高速發展。行程當然唔少得參觀文化景點及博物館，包括天津之眼、周恩來鄧穎超紀念館及天津博物館等。
青年團員紛紛表示，經過今次交流體驗活動，除咗增加對國家發展嘅認識，仲有機會認識各屆「成功有約」計劃學員以及內地嘅大學生，亦提升咗溝通能力，仲識到新朋友。
