@ 
馬上就係農曆新年啦，今個星期食環署、深水埗民政處、環保署同康文署，分別喺北河街街市（27/1）及保安道街市（28/1）發起一年一度「歲晚清潔大行動」。
尋日（28/1），深水埗民政專員王浩宇同一眾地區管理委員會嘅成員，包括深水埗區環境衞生總監黃偉能、深水埗區康樂事務經理何寶珠、高級環境保護主任李燕珍，約埋多位深水埗區議員，一齊去咗長沙灣保安道市政大廈同街坊交流，派發宣傳單張同紀念品，並呼籲大家注重環境衞生。清潔龍阿德同財神爺都有到場，同大家拜個早年，提醒街市檔戶注意食物安全，呼籲一眾街坊合力防鼠，保持身體健康歡度新年。
民政專員王浩宇更呼籲大家將大掃除嘅精神由屋企延伸到社區每個角落，讓深水埗成為一個更潔淨舒適嘅幸福社區。
@