@ 
農曆新年就快到喇！為提醒街坊喺新春期間留意個人財物同家居保安，同時提升防騙意識，荃灣區撲滅罪行委員會聯同荃灣區少年警訊，喺尋日（30/1）舉辦咗「荃城滅罪展揮毫」活動。
活動當日，荃灣區撲滅罪行委員會一眾委員，聯同荃灣警區及荃灣民政處代表，同市民一齊寫揮春、迎新歲，喺歡樂氣氛中宣揚防罪信息。
香港警察書畫學會會員即席揮毫寫揮春，少年警訊及耆樂警訊會員陪同嘉賓向市民派發福字月曆、揮春同防罪宣傳單張，聯同一眾滅罪會委員主動走入社區，向街坊講解防盜、防騙及家居保安貼士。活動透過寓教於樂嘅方式，將防罪信息融入濃厚嘅新年氣氛之中，提升市民警覺性，攜手迎接一個平安、安心、無罪案嘅新一年。
