@ 
日前（30/1），葵涌警署外牆響起一片歡呼同掌聲——「葵青滅罪同心牆」壁畫，經過差唔多半年的籌備同繪製，正式收筆完成。
葵青警區好榮幸邀請到葵青區民政事務專員梁乘龍太平紳士、新界南總區指揮官張惠華助理處長、葵青警區指揮官黃宏業總警司、南沙華僑總會胡意發會長、「畫美麗香港主席」譚秀芳女士以及葵青區少年警訊及耆樂警訊一眾會長同埋參與嘅學校及社區團體代表一同嚟到「葵青滅罪同心牆收筆禮」，一齊見證呢個警民同心嘅成果。
呢幅壁畫展示咗葵青區嘅特色同活力：由葵青貨櫃碼頭、青馬大橋，到區內傳統節日慶典，例如真君誕、天后誕，全部畫咗喺幅牆上面。當然，仲有警隊防罪吉祥物，宣傳防騙嘅「提子」、宣傳交通安全嘅「熊Sir」、代表少年警訊嘅「豆苗仔」 同埋耆樂警訊嘅「豆大師」！
典禮中，亦特設由繪製壁畫活動相片砌成嘅心形相片牆，吸引各個嘉賓打卡留念，記低呢份同心同行嘅情誼。 青衣商會小學醒獅隊亦到場表演，為活動增添喜慶氣氛。
「葵青滅罪同心牆」唔單只係一幅壁畫，更加係警民合作、社區共融嘅溫暖象徵。下次經過葵涌警署，記得停低腳步，同呢面充滿故事嘅壁畫影張相啦。
打卡點：葵涌警署外牆
創作團隊：你同我，每一位葵青街坊
