@ 
「傳愛迎馬 - 春暖中西區農曆新年市集」一連兩個周日（1/2及8/2）舉行，昨日（8/2）圓滿結束喇。市集由中西區民政處、中西區區議會同香港中西區各界協會合辦，喺新春前帶嚟兩個充滿幸福感同歡樂嘅周日，同大家一齊迎接馬年過新年。
呢兩個星期嘅市集設有各式各樣嘅零售攤檔、賀年貨品攤檔、美食同埋特色「打卡」點，吸引咗好多一家大細同埋唔同文化背景嘅旅客到場參與。
市集嘅非遺文化手藝工作坊同埋即場寫揮春派發都非常受歡迎！工作坊以賀年為主題，非常多元化，有搖鼓製作、剪紙、京飾手作等，好多家長帶埋仔女一齊嚟參加，喺導師嘅悉心指導下，一齊製作自家作品，體驗傳統文化精髓之餘，同時享受親子樂。另一方面，當大家收到獨一無二嘅揮春後，都充滿喜悅，福氣滿載。
唔少市民買完嘢之後，都坐喺特色茶座Chill一Chill，一邊品嚐傳統地道小食，一邊享用手工奶茶，度過寫意又充實嘅周日！
@