@ 
歲晚將至，又到大掃除嘅時候，大家一齊以清新整潔嘅環境迎接新一年嘅精彩開始!
雖然未到「年廿八，洗邋遢」，但深水埗民政處早前（6/2）已響應「歲晚清潔大行動」，統籌跨部門聯合清潔行動，聯同食環署、社署同路政署，一齊喺美孚交通交匯處橋底同深水埗港鐵站C2出口附近進行重點清潔，齊心除舊迎新!
今次行動有賴各部門通力合作，以及各位街坊嘅配合，一共清走咗接近70公斤嘅雜物同垃圾，街道環境煥然一新！
深水埗民政處會繼續與各部門攜手提升街道清潔水平。希望大家都一齊出一分力，保持社區整潔，共同打造一個乾淨、舒適又企理嘅深水埗！
