@ 
尋日（10/2），九龍城民政處舉辦咗「特色社區之香港龍城深度遊」資訊牌揭幕暨項目總結典禮。民政總署署長杜潔麗、中聯辦九龍工作部副部長郭長勇、九龍城民政專員蔣志豪、旅遊事務署助理專員陸玉珊、市區重建局總經理陳碧霞、九龍樂善堂總幹事劉愛詩，以及香港城市大學副校長陳志豪蒞臨主禮，與市民一齊見證項目嘅成果，場面熱鬧，之後亦喺城市大學學生引領下，探索九龍城區嘅資訊牌，行程豐富有趣！
旅遊資訊牌豎立喺具有九龍城區歷史文化特色嘅位置，包括九龍寨城公園、九龍樂善堂、石屋家園、侯王古廟、侯王道、城南道、賈炳達道等，共有9塊資訊牌。參觀期間，城大學生透過資訊牌分享九龍城嘅歷史與文化，例如九龍寨城嘅名稱由來同文人詩歌創作時嘅趣聞，大家都聽得好入神！其中有幾個設計資訊牌時嘅小巧思，原來當年啟德機場飛機降落十分依賴導航燈嘅引領，所以橙白色嘅導航燈同可愛嘅導航員角色靈感都源自啟德機場。大家都聽得津津有味，樂在其中。
只要掃描資訊牌上嘅二維碼，就可以進入「龍城深度遊」主題網頁，了解景點故事、附近推薦嘅景點同食肆。你知唔知舊啟德機場嘅飛機點降落？當年九龍寨城嘅生活又係點？點解九龍城會潮泰食肆林立？大家喺街上留意到資訊牌時，不妨掃描資訊牌或直接進入主題網頁 https://kowlooncitywalk.hk/ 揾答案啦！
如果你想預先計劃遊覽行程，可以用「龍城深度遊」網頁新增嘅互動地圖功能，只要回答幾條簡單問題，選擇自己感興趣嘅主題故事，就可以一鍵設計專屬路線，非常方便快捷；想開啟九龍城美食之旅？記得睇旅遊發展局九龍城網站嘅美食推介；如果想輕鬆漫步九龍城，睇完精彩嘅《九龍城寨光影之旅》電影場景展後，記得攞份「地膽遊龍城」紙本地圖，跟住上面嘅標示，「食」、「買」、「玩」樣樣齊全！無論你係計劃行程派 (J人)，定係隨性探索派 (P人)，都唔好忘記留意街道上嘅AR裝置，攞起手機掃描一下，體驗歷史和科技結合嘅樂趣！
農曆新年將至，無論你想追憶寨城歷史同機場歲月、感受香港電影嘅光影印記定係品味泰國風情同潮州滋味，都快啲嚟九龍城區體驗下啦！
