@ 
馬年即將來臨！荃灣區節日燈飾籌備委員會聯同荃灣民政處，已經喺區內布置咗多款賀年燈飾，以熊貓、全運會及賀年為設計主題，同大家一齊辭舊歲、迎新春，「荃」力為社區營造濃厚嘅節日氣氛。當中亮點燈飾包括：
1. 荃灣港鐵站往富華中心行人天橋
天橋上布置咗「財神送金元寶」燈飾，寓意大家新一年財源廣進！同時配合附近西樓角花園行人通道五光十色嘅拱橋走廊，橋上以走馬燈方式送上新年祝福，喜氣洋洋。
2. 荃豐中心行人天橋
橋身兩面均有不同新年元素燈飾。適逢今年新年緊接情人節，委員會特別設計咗財神同愛心融合嘅燈飾圖案，成為人氣打卡亮點，千祈唔好錯過！
3. 荃灣沙咀道遊樂場至荃灣裁判法院一帶
橫跨馬路嘅燈飾天幕，加上馬路分隔欄嘅可愛熊貓、駿馬奔騰、全運會運動員造型、新年揮春等圖案，同鄰近雅麗珊社區中心嘅天橋燈飾互相輝映，無論行人定係搭車經過，都可以欣賞到耀眼奪目嘅新年燈飾！
除咗以上介紹嘅亮點，大家亦可到以下地點欣賞色彩斑斕嘅燈飾：
楊屋道及禾笛街交界至大河道一段馬路中央分隔燈牌
楊屋道爵悦庭及康睦庭園對出行人天橋
荃灣公園近楊屋道入口行人通道
荃灣海濱長廊
歡迎大家嚟荃灣區「打卡」，一齊感受歡樂滿載嘅新年氣氛！預祝大家身體健康，馬年進步！
