@ 
農曆新年將至，梗係要熱熱鬧鬧過新年！九龍城民政處同九龍城區議會喺2月舉辦咗一連串新春賀年活動，同街坊一齊迎接充滿活力嘅馬年！
活動包括：
1.到訪土瓜灣遊樂場年宵市場
農曆新年又點少得行年宵？九龍城居民今年不假外求，食物環境衞生署首次喺九龍城區舉辦年宵花市，地點就喺土瓜灣遊樂場。今日（12/2），九龍城民政專員蔣志豪同九龍城區議會及三會成員，一齊去到土瓜灣遊樂場年宵巿場，向各位市民同檔主拜個早年，送上最誠摯嘅問候同新春祝福，並鼓勵街坊積極參與。專員仲特別為由區內中學生擺設嘅攤檔加油打氣，鼓勵佢哋透過參與地區節慶活動積極投入社會，同時訓練商業營運技巧。大家都滿載而歸，齊齊提振地區經濟，旺丁又旺財！
2.派發賀年禮品及手寫揮春
2 月上旬，九龍城民政助理專員張彥喬聯同一眾九龍城區議員，親身去到街頭同大家見面，向市民送上暖心祝福！除咗派發精美嘅賀年禮品，仲即席寫揮春送畀大家，將滿滿嘅新年祝願帶返屋企，家家戶戶都開心！
馬年將至，新一年九龍城民政處同九龍城區議會會繼續努力，服務地區，同各位街坊攜手建設一個更和諧、更有活力嘅社區！最後祝大家福馬臨門、龍馬精神、馬力全開、馬到功成！
