@ 
2026年2月12日，九龍城警區指揮官陳少鳴總警司、九龍城區耆樂警訊名譽會長會主席陳婉儀女士、副主席鍾子權先生MH和名譽會長譚綺雯女士，帶領九龍城區耆樂警訊一班老友記嚟到土瓜灣遊樂場年宵市場進行防騙防罪宣傳活動，向攤檔及市民派發宣傳單張，提醒嚟行年宵嘅市民，要小心保管財物，提防扒手，更要提防電話騙案，時刻保持警覺，避免賊人有機可乘，以免招致損失。
農曆年將至，除了派發宣傳單張，亦送上由耆樂警訊嘅老友記親手書寫嘅應節揮春，將吉祥嘅祝福語送畀市民街坊。
年近歲晚，提提大家
行年宵，要小心保管財物，提防扒手
出門前鎖好門窗，做好家居保安
提醒家人及長輩小心騙案陷阱
唔好輕易相信陌生來電及訊息
祝大家，馬年行好運！身體健康！
土瓜灣遊樂場年宵市場已經喺2月11號開始咗喇！今年仲係首次舉行，為期7天嘅市集匯聚咗82個乾濕貨及快餐攤位，場內仲有賀年擺設及一片桃花林供市民打卡添，確實係大家辦年貨同埋感受節慶氣氛嘅好去處。各位土瓜灣嘅街坊，快啲入去支持同打卡啦！
