@ 
九龍城區係全港最多學校嘅地區，區內幼稚園及中小學合共超過200間。九龍城民政處聯同區內團體早前舉辦咗2項活動，嘉許區內傑出家長教師會同學生。
日前（17/1），九龍城區家長教師會聯會喺鄧鏡波學校舉辦咗「九龍城區家長教師會聯會周年大會暨九龍城區傑出家長教師會頒獎典禮」，九龍城民政助理專員張彥喬、九龍城警區指揮官陳少鳴、教育局高級學校發展主任（九龍城）李美姍、香港都會大學副校長鄺志良、家庭與學校合作事宜委員會主席方奕展等嘉賓皆出席主禮，場面熱鬧。
典禮表揚來自33間中、小學同幼稚園嘅家長教師會團隊，感謝佢哋嘅熱心付出，希望鼓勵更多家長積極參與家長教師會活動，一齊推動家校合作。當日仲有好多精彩表演，包括中國舞、合唱團同扯鈴演出，大家都睇得好投入！
另外，由九龍城區校長聯絡委員會與九龍城民政處合辦嘅「九龍城區傑出學生選舉」亦於16/1順利舉行，九龍城民政助理專員張彥喬、教育局總學校發展主任（九龍城）李廣榮同一眾校長擔任面試評審，分別喺小學、初中、高中三個組別中，各選出10位本年度「九龍城區傑出學生」。
未來，九龍城民政處會繼續同區內持份者合作，為學生打造更良好嘅成長環境，令佢哋喺關愛同支持中快樂學習，健康成長，盡展潛能。
