@ 
中西區民政處聯同中西區青年網絡舉辦咗「幸福滿『社』」同「走上型與格2.0」兩項充滿幸福感同溫暖嘅活動，吸引咗好多青年朋友踴躍參加！
1)「幸福滿『社』」
「幸福滿『社』」系列由上年10月開始，一連4個月為青年朋友舉辦各類工藝活動，每個月嘅主題都唔一樣，包括製作黃銅手鐲、黃銅月亮鎖匙扣、純銀戒指同埋純銀手鐲。除咗有導師向參加者講解基本工藝技巧，例如設計字樣、打磨、雕刻、抛光等，仲有專業社工帶領佢哋認識正向情緒同幸福元素！參加者喺活動中結識到志同道合嘅朋友，一齊分享將自己嘅設計意念轉化成實物嘅滿足感！
2)「走上型與格2.0」
繼2023年第一期活動反應熱烈，「走上型與格2.0」喺今年1月再次召集一班對化妝同髮型設計有濃厚興趣嘅青年參加！專業化妝師首先介紹各種化妝品、專業化妝同頭髮造型工具，再示範正確化妝步驟同髮型設計技巧。學員互相練習，更喺「叮叮攝影團」學以致用，為長者化妝同設計耳目一新嘅造型。喺懷舊嘅「叮叮」電車同區内迷人景色相伴下，大家都展露出燦爛嘅笑容，擺出各款有型姿勢留影。
年青朋友都覺得可以將所學付諸實踐好有成功感！而且可以喺一趟電車旅程中同各位老友記傾偈交流，傳遞幸福感同關愛，覺得十分有意義！
