@ 
屯門民政處尋日（25/2）舉辦新春酒會 ，民政總署署長杜潔麗、中聯辦新界工作部副部長王卉、屯門民政專員兼區議會主席關可臨，以及屯門鄉事委員會主席劉業強議員，與區內各界人士以及政府部門代表聚首一堂，分享節日嘅祝福，共迎新歲。
署長致辭時感謝 大家一直支持民政處嘅工作，區議員、關愛隊及「三會」成員「三駕馬車」、屯門鄉事委員會，都係推行地區治理嘅堅實支柱，有大家嘅協助，加上各個青年團體、地區組織嘅鼎力支持，屯門區將持續進步。
同場亦舉行「屯門民政事務處嘉許計劃」頒獎典禮，表揚多位長期熱心服務屯門區嘅人士，感謝佢哋造福居民 。
新春酒會現場有傳統客家茶粿同飛機欖呢兩款特色小食，簡簡單單嘅小食承載住香港文化同故事，而製作呢兩款小食嘅技藝都係香港非遺項目，特別有意義 。
展望新一年，屯門民政處將繼續同各政府部門，以及屯門各界人士攜手並肩，將工作做深做廣，努力服務屯門區居民。
@ 