@ 
日前（15/2），由九龍城區防火委員會主辦、九龍城民政處及香港消防處協辦嘅「社區應急先鋒訓練課程」喺馬頭涌消防局順利舉行。今次課程共有24名九龍城區內居住、工作或者就讀嘅市民參加。
課程包括網上及課堂學習兩部分，內容豐富，包括防火知識、大廈滅火設施使用方法、心肺復甦法（CPR）同自動心臟除顫器 (AED)使用方法等。完成課程並喺筆試合格嘅學員會獲得香港消防處頒發嘅「社區應急先鋒委任證書」。
眾所周知，要拯救心臟驟停嘅患者，必須盡快為佢哋施行CPR，並使用AED進行除顫電擊。所以，政府嘅處所亦逐步增設AED，以便有需要嘅時候為患者進行急救。
課程中，參加者都好主動同投入。先由梁sir講解點樣正確使用消防喉轆、滅火筒同滅火氈，學員仲親身試用滅火筒，大家都好主動嘗試；之後由朱sir同石sir講解點樣處理燒傷、燙傷、出血、中暑、扭傷、骨折同流鼻血等情況；朱sir亦親自示範點樣施行CPR及使用AED，參加者都好踴躍學習，表示當遇到緊急情況要施行CPR同使用AED嘅時候，會更有信心去救人，救援過程亦會更加順暢。
展望未來，九龍城民政處同九龍城區防火委員會會繼續與香港消防處合作，宣傳及推廣防火信息，讓市民安居樂業。
