@ 
駿馬奔騰迎新春 ，政通人和賀新歲。
尋日（26/2）下晝，由九龍城民政處主辦、九龍城區議會合辦嘅「福滿龍城」丙午年新春團拜喺紅磡社區會堂舉行。民政總署署長杜潔麗、中聯辦九龍工作部副部長郭長勇、九龍城民政專員蔣志豪同立法會議員楊永杰皆到場主禮，與大家聚首一堂慶祝新春。
今次嘅新春團拜節目豐富，有古箏同琵琶聯奏，表演《花好月圓》、《月亮代表我的心》等經典曲目，旋律動人；仲有醒獅表演，祝願國家國泰民安、香港馬年大吉，九龍城居民安居樂業；其後係熱鬧嘅舞獅採青環節，撒下生菜，寓意「生財」。舞獅喺台下巡遊時，大家都迫不及待摸摸獅頭同獅尾，希望馬年由年頭順到年尾，場面非常熱鬧。現場亦設有馬年主題打卡區；有九龍城區中小學生參與設計同操控嘅機械幼獅表演，同嘉賓互動，科技感十足；仲有本區小學生舞幼獅，嘉賓大讚可愛！
署長致辭時肯定九龍城地區「三會」、區議會同關愛隊嘅「三駕馬車」，完善地區治理，協助處理突發事件，展現咗優秀嘅團隊精神。另外，過去一年喺啟德體育園同龍城深度遊等項目上嘅成果亦令全港市民受惠。
駿馬奔騰，象徵活力同行動力。展望馬年，九龍城民政處會繼續同各地區團體齊心協力，支持政府地區工作，秉持「民政幫到你」嘅精神，為市民打造一個美好又充滿活力嘅九龍城。
