@ 
為加深青年對公共事務嘅參與，屯門民政處同屯門區青年發展及公民教育委員會再度舉辦「領袖青苗」 屯門區公民教育青年領袖培訓計劃。今次有區內14間中學，共27位中二至中三學生參加，於27/2完成最後一個環節 — 模擬區議會。
「領袖青苗」計劃為期5個月，內容包括加深認識完善地區治理同區議會職能及工作嘅課堂、列席區議會會議、同政府部門實地視察社區設施，以及參觀律政中心、安全社區體驗館等活動 。
當日同學嚟到屯門區議會，模擬擔當區議員嘅工作，就改善社區環境、推廣防騙教育及關注學生精神健康等議題提出意見 。模擬區議會按照一般區議會安排進行，由屯門民政專員兼區議會主席關可臨主持。學生除咗就相關議題提交討論文件之外，喺會議上亦主動參與發言，而出席會議嘅政府部門代表亦細心聆聽青年人嘅建議並作出回應。
學生表示，參與計劃令佢哋對社區嘅觸覺同分析能力都有所提升，亦對特區政府架構、區議會嘅職能，以及各部門嘅日常工作有更深入了解，深刻體驗參與社區服務，致力 成為未來領袖，為屯門、為香港作出貢獻！
