@ 
時至今日，沙田區仍然保留住濃厚嘅圍村傳統習俗，村民會喺新年聚首一堂，互相祝賀，共慶新春！就帶大家一齊感受沙田鄉村獨有嘅節日氣氛！
1. 山下圍（曾大屋）新春食盆菜
沙田曾大屋喺正月十三（1/3）舉辦「丙午年新春盆菜聯歡」，村民喺曾大屋圍門前相聚，仲有社區賢達同埋好多海外返嚟嘅親朋好友，大家開心圍埋一齊食盆菜！今年設有130席嘅盆菜流水宴，場面熱鬧！
活動特設兩個非物質文化遺產項目—— 舞獅同舞麒麟表演，以及邀請嘉賓一齊進行傳統特色嘅「客家拉年糕（茶粿）」。大家一齊同賀新春氣氛熱鬧 ，圍村內處處洋溢笑聲，充滿濃厚嘅新年氣氛。村代表、鄉委會主席聯同政府部門代表向村民送上祝福，與大家度過一個有傳統特色同滿滿喜慶嘅晚上！
2.田心村元宵 花燈勝會
每年正月十四，沙田田心村村代表會帶領麒麟隊前往車公古廟，恭請車大元帥駕臨田心村於燈棚「坐陣」，於元宵節賞花燈。麒麟隊亦會去到新添男丁嘅村民屋企迎接花燈，並將花燈掛上燈棚，寓意「繼後香燈、開枝散葉」。
今年正月十五（3/3）元宵節，中聯辦新界工作部副處長余劍文、沙田民政助理專員鍾碩華、沙田鄉事委員會主席莫錦貴、沙田各界大聯盟主席潘國山、沙田鄉紳蔡根培、政府部門代表及社區賢達參加一年一度嘅「田心村元宵佳節花燈勝會」。儀式首先由村代表及鄉親父老帶領田心村麒麟隊，以傳統打鑼鼓舞麒麟鄉村習俗，引領嘉賓及村民到燈棚向車大元帥上香祈福，祈求新一年百業興旺，事事順，風調兩順，闔家平安。儀式過後有切金豬同盆菜宴，喺圍村喜慶氛圍中共慶元宵佳節。
