@ 
由香港遊艇會主辦嘅第八屆熨波洲盃龍舟賽喺上星期六（28/2）圓滿舉行！
今年賽事吸引咗大約380名龍舟好手，組成32支小隊參加。雖然當日略有風浪，但一班選手都無退縮，佢哋乘風破浪、愈戰愈勇，由朝早8點到黃昏5點半，總共上演咗44場賽事，喺海面上展現出無限拼勁同熱血！
龍舟賽唔止考速度，仲要鬥耐力同團隊合作，真係超高水平嘅考驗！ 比賽當日南區民政助理專員Lynn及中國香港龍舟總會（賽事）副主席譚昭義亦到場支持！成個賽事充滿青春活力，歡呼聲不斷！
南區梗係唔止呢一場龍舟盛事，嚟緊端午節喺赤柱同香港仔仲有多場龍舟競賽，如果大家想繼續感受呢份熱血同活力，就唔好錯過喇！歡迎大家到時嚟參與同觀看龍舟比賽，感受熱鬧嘅節慶氛圍，體驗傳統嘅漁港風情及享受南區嘅滿滿活力！
圖片來源：香港遊艇會（RHKYC）
@ 
@