@ 
由離島民政處舉辦嘅長洲社區會堂開幕典禮昨日（6/3）圓滿舉行！民政總署署長杜潔麗、中聯辦新界工作部副部長孫學偉、民政總署副署長王婉蓉、離島民政專員楊蕙心、建築署助理署長鍾鳴昌、長洲太平清醮值理會主席暨長洲鄉事委員會顧問翁志明及長洲鄉事委員會主席吳文傑，與一眾離島地區領袖及社會賢達聚首一堂，共同見證社區發展嘅新里程！
主禮嘉賓先進行剪綵同切金豬儀式，寓意新一年大家吉祥好運，離島區風調雨順。隨後，一眾嘉賓欣賞精湛嘅舞麒麟、舞大象同舞獅表演，鑼鼓聲中仲有長洲傳統特色嘅飄色巡遊，場面熱鬧，觀眾全程投入。祝願離島區百業興旺 ，社區欣欣向，居民安居樂業。
長洲社區會堂位於長洲西堤道11號。會堂採用現代化嘅設計，並融入長洲平安包嘅標誌性粉紅色及其他長洲元素，天台休憩處亦可以供居民及遊客觀賞長洲嘅景色。
杜署長致辭時表示，長洲除咗係一個充滿活力嘅香港著名旅遊勝地，更係一個擁有深厚文化底蘊同緊密鄰里關係嘅傳統社區。新落成嘅社區會堂正正能夠為居民提供一個舒適且多元化嘅活動空間，有助提升社區凝聚力同活力，杜署長感謝離島區區議會及地區團體對項目嘅鼎力支持。
離島民政處再次感謝各界一直以嚟嘅支持同努力，特別感謝長洲各團體嘅熱心支持。祝願大家新一年大吉大利，龍馬精神，萬事亨通！
@ 
@