提防騙子 • 防騙宣傳

為咗進一步提升市民嘅防騙意識，同時推廣最新防騙資訊，今日（3月9日），警民關係組嘅「防騙專員」又出動啦！今次仲特別聯同新界南總區防止罪案辦公室嘅同事，一齊去到荃灣沙咀道同青山公路附近嘅中國銀行，向「荃」民派發防騙宣傳單張同精美紀念品，藉此提醒大家要時刻留神，提防層出不窮嘅騙徒手法。

提提大家除咗要密切留意最新防騙資訊同騙徒嘅作案手法，仲記得要提醒身邊嘅親朋好友，等更多人一齊提高警覺，攜手防範騙案！大家一齊記住：騙案一單都嫌多。