@ 
第四屆Running Pet嘉年華喺剛過去嘅星期日(8/3)於饒宗頤文化館圓滿舉行！活動由深水埗民政處及香港中華文化促進中心合辦。今屆以足球為主題，將運動帶入寵物世界，藉此推廣人寵共融同多做運動嘅信息，為社區注入更多活力同正能量。
今屆嘉年華特意推出「愛寵Fine-dining」體驗同埋「寵物星光大道」打卡熱點，讓主人同毛孩喺饒館小森林撐枱腳，一齊打卡留念。見到毛孩大大啖享受「寵物壽司」同「佛跳牆」，各位主人都樂在其中 ，與愛寵共度一個閒適嘅下午。
活動當然唔少得一如既往大受歡迎嘅亮點項目，包括四大紀律部隊工作犬表演、人寵足球定向運動、Doga毛孩瑜伽體驗、寵物市集、寵物專區及動物社企組織攤位。無論係想同「主子」嘗試新體驗、一齊揀件心頭好，定係鍾意睇動物表演嘅朋友，都玩得盡興而歸。
民政及青年事務局 Home and Youth Affairs Bureau副局長梁宏正、深水埗民政專員王浩宇、饒宗頤文化館總幹事李高凱盈、深水埗區議會提振地區經濟專責工作小組主席黃俊雄、中國香港足球總會董事胡偉民等嘉賓為活動主禮。感謝九巴喺饒館加設寵物巴士站，讓主人同寵物輕鬆出行，以及中國香港足球總會嘅大力支持。
