@ 
凝聚傑出力量，共創閃耀未來！第36屆「荃葵青區傑出學生選舉」頒獎典禮前日（10/3）圓滿舉行，現場氣氛熱烈，掌聲不斷！荃灣民政專員區家盛同葵青民政專員梁乘龍均親臨主禮，為一眾優秀嘅同學打氣。梁專員致辭時表示，政府一直致力推動青年發展，並勉勵各位同學要裝備自己，成為社會堅實棟樑、貢獻社會、報效國家！
呢項學界年度盛事由荃灣葵涌及青衣區中學校長會以及葵青區青年發展及公民教育委員會合辦、葵青民政處協辦，旨在表揚區內中學生喺學術、領導才能同社區服務方面嘅卓越表現，鼓勵佢哋持續進步，將來貢獻社會。
今屆選舉共有44間中學參與，每間中學提名一位中五學生參賽，競爭相當激烈！經過嚴格面試，最終選出12位傑出學生及32位優異學生，表彰佢哋喺各方面嘅卓越表現。評審團今年更以《青年發展藍圖》中嘅《自強篇》為題，考核同學對全人發展及抗逆自強嘅理解，考驗佢哋嘅學識、視野同價值觀！
再次恭喜所有獲獎同學！期待佢哋繼續茁壯成長，成為有抱負、有承擔嘅新一代，將青年力量帶入社區，為國家與香港嘅發展貢獻所長，一同譜寫盛世新篇章！
@ 