@ 
九龍城區係全港最多學校座落嘅地區，區內歷史悠久嘅民生書院正式踏入一百周年；而九龍區第一間公立醫院 — 九龍醫院亦已經服務市民百年。
上星期六（7/3），民生書院舉行百周年校慶開放日，慶祝學校嘅輝煌歷史並為幼稚園開幕。教育局常任秘書長陳穎韶、九龍城民政專員蔣志豪、中聯辦教育科技部副處長陳志祿、九龍城警區指揮官陳少鳴等一眾嘉賓主持開幕儀式，一同見證歷史性時刻，現場氣氛熱烈歡騰！
開放日吸引校友、家長、學生同社會各界人士到場，學生帶領嘉賓參觀由幼稚園生製作嘅青花瓷「龍」 ，以及獲世界賽獎項 嘅機械人，並體驗操作遙控機械人。另外，嘉賓亦參觀咗「民生人．民生仁」嘅主題展覽，了解「人人為我，我為人人 」嘅校訓精神，見證民生書院全人教育成果同埋學生嘅無限潛能。
同日，九龍醫院喺醫院大草地舉辦「九龍醫院100周年紀念嘉年華」，與一眾嘉賓同市民一齊慶祝醫院一百年來守護社區健康嘅珍貴歷程。九龍城民政專員蔣志豪聯同醫院管理局行政總裁李夏茵、九龍醫院及香港眼科醫院管治委員會主席鄭惠貞等，一齊主持啓動儀式，見證九龍醫院邁向新里程嘅關鍵時刻。
現場設有導賞團參觀醫院設施、「保背護脊健康十式」示範 ，以及歷史建築同嘉年華攤位，推廣健康資訊，吸引眾多街坊到場支持，將醫院百年守護社區健康嘅精神延伸至社區每一個角落。
