@ 
一年一度嘅紅磡觀音廟「觀音開庫」已於13/3至14/3（農曆正月廿六）期間圓滿舉行！每一位到場嘅善信都同心祈福，為新一年添上美好意頭 。今年「觀音開庫」吸引逾2萬3千名善信參與，場面熱鬧而有序 。
「觀音開庫」係香港歷史悠久嘅傳統習俗。善信於農曆正月廿六到廟宇參拜，向觀音菩薩「借」象徵財運嘅庫銀 ，寓意來年財運亨通、萬事順遂，同時亦祈求健康、平安。九龍城區嘅紅磡觀音廟尤其聲名遠播，因為喺二次大戰期間，紅磡係空襲嘅目標，觀音廟周遭房屋喺轟炸中化為斷壁殘垣，惟有觀音廟奇跡地保留落嚟。自此之後，紅磡觀音廟就被虔誠嘅善信視為觀音大士顯靈庇佑，香火越來越鼎盛。
活動期間人潮絡繹不絕，善信帶備香燭及金銀衣紙，依循指示有序入廟參拜及領取庫銀。除咗本地善信，亦有世界各地嘅旅客慕名而來，一同感受香港傳統文化嘅獨特魅力 。
為疏導人流，警方喺現場架設鐵馬並實施人流管制措施 ，安排善信於佛光街遊樂場及蕪湖街遊樂場輪候 。現場亦設有「關愛區」，畀長者、行動不便、傷健人士、孕婦等有需要人士坐住排隊，體現關懷共融嘅精神 。
九龍城民政處喺活動前協調各參與部門及進行場地視察，並喺活動期間與各部門密切留意人流及各方面情況。今次大型活動能夠順利舉行，九龍城民政處藉此衷心感謝華人廟宇委員會同紅磡觀音廟嘅妥善安排，以及警務處、食環署、康文署、運輸署、路政署、房協、醫療輔助隊、民安隊同港鐵嘅通力合作！全賴各個單位緊密配合，不辭勞苦咁維持秩序同提供協助，先令到活動得以暢順、安全同有序咁進行！
感謝大家一同傳承本地珍貴嘅傳統文化，九龍城民政處期待未來繼續與市民攜手支持本地傳統習俗及文化活動。
