@ 
龍山及鳳水分區委員會作為「三會」一份子，一直肩負服務市民嘅責任 。兩個分區會除咗舉行會議深入討論民生議題 ，更用心籌辦各式各樣嘅社區活動 ，亦與不同團體通力合作 ，致力提升居民嘅生活質素 。
本屆分區委員會任期即將屆滿，等我哋同大家一齊回顧吓龍山及鳳水分區會喺2024-2026年度嘅工作成果 :
定期會議 ・致力優化地區建設
透過分區委員會會議，委員積極討論地區工程 、改善公眾設施及交通配套等議題，收集街坊意見後與部門跟進協調，促成多項優化民生嘅項目落地，例如雍盛苑後山斜坡改善工程 、蝴蝶山 避雨亭嘅擴建工程、皇后山邨龍馬路行人過路處改善工程 、擴建龍豐花園巴士站候車區 、修葺石湖新村鄉村道路路面 、增加彩園邨廚餘回收桶等，致力改善居民嘅生活環境 。
節慶活動 ・凝聚社區
籌辦不同性質嘅社區建設活動，包括回歸綜合匯演 、國慶酒會 、國慶嘉年華 、賀國慶足球表演賽 等大型節慶活動，吸引數千名街坊參與，一齊分享國家及特區發展嘅喜悅 ，增強歸屬感與愛國情懷！
政策宣傳 ・擔當政府與社區嘅橋樑
聯同北區民政處合辦大廈管理簡介會 ，讓街坊學習實用樓宇管理知識；齊心參與打擊店鋪阻街宣傳 ，親身落區提醒商戶保持通道暢通；全力參與2025年立法會換屆選舉宣傳街站，呼籲街坊踴躍投票 。委員積極走進社區，促進與居民嘅交流 ，擔當重要 嘅橋樑角色。
展望未來 ，北區民政處期待與龍山及鳳水分區委員會同埋各持份者繼續攜手並肩 ，共同建設更美好嘅北區家園 ！
