@ 
九龍城區有接近200間幼稚園、小學、中學同大學，係香港未來人才嘅搖籃。九龍城民政專員蔣志豪喺過去幾日出席區內傑出學生選舉頒獎典禮，又走入校園，加強與區內學校嘅聯繫。
九龍城區傑出學生選舉已有超過20年嘅歷史，今年共收到超過140份來自小學組、初中組同高中組嘅提名，旨在選出品學兼優同熱心服務社會嘅同學。
由九龍城區校長聯絡委員會主辦、九龍城民政處合辦嘅九龍城區傑出學生選舉頒獎典禮喺14/3順利舉行。頒獎典禮場面熱鬧，得獎學生、家長、校長同老師共接近400人齊集現場，一齊見證呢班模範學生嘅光輝時刻。活動由歷屆傑出學生組成嘅九龍城區傑出學生協會擔任司儀同工作人員，佢哋致力貢獻社群，提攜後進，讓傑生精神薪火相傳。
今年嘅評選文章題目為「人工智能對世界的影響」，蔣專員特別提醒同學使用AI時要保持獨立思考，培養良好素養同責任感，讓科技真正成為推動進步嘅力量。佢同時勉勵得獎學生要承傳「傑生精神」，繼續奮發向前，將熱誠感染身邊嘅人，為社會注入更多活力！
除此之外，蔣專員繼續走入校園，與學校展開並保持緊密聯繫。佢喺前日(17/3)先後拜訪位於何文田嘅德蘭中學及旅港開平商會中學，與校長同老師會面交流，了解區內青少年嘅需要，並聆聽教育界對社區事務嘅建議。
德蘭中學校長葉妙顏分享咗佢哋以全人教育為核心，培養學生德行與品性兼備。學校以「連繫」作為核心精神，舉辦多元化活動，包括「校長廚房」、親子工作坊、領袖生訓練營等，唔單止加強家長與學校之間嘅溝通，亦令學生對學校建立更深嘅歸屬感。
旅港開平商會中學校長陳得南表示，除咗升學之外，學校更希望幫助學生成長。學校重視破格思維，陳校長亦經常同學生共進午飯，爭取與學生溝通嘅時間。除咗課業之外，學校亦積極發掘同學喺音樂、運動、藝術、科學等多方面嘅才能，為學生提供開放平台，讓佢哋發揮所長，發光發亮。
蔣專員感謝學校盡心培育區內學生，亦非常欣賞學校創新求變嘅精神，期望未來與區內不同學校有更多合作同聯繫，凝聚社區資源，一齊支持區內學生成長！
