@ 
美孚三區嘅關愛隊前日（19/3）聯合舉辦咗新春「老友記生日會」關愛活動，將溫暖、愛心同祝福送到區內嘅老友記手中。
今次生日會有超過300位公公婆婆參加，當中更有一位年屆101歲嘅壽星伯伯同埋佢「90後」嘅壽星太太齊齊嚟慶祝生日，仲同大家分享白頭到老嘅秘訣，活力十足！一班老友記一齊玩小遊戲，把茶言歡，共度一個難忘又開心嘅下午。
深水埗民政助理專員王懿詩、深水埗區議員郭彥麗同胡詩韻等嘉賓都有到場為老友記送上生日祝福、親切交流同玩遊戲。
深水埗民政處會繼續夥拍關愛隊同其他地區團體，致力為區內長者提供更貼心嘅支援服務，希望大家多關心身邊嘅老友記，細心聆聽佢哋嘅需要，攜手締造一個滿載溫暖嘅社區！
@ 