@ 
由九龍城區防火委員會主辦、九龍城民政處同香港消防處協辦嘅「九龍城區防災應急活動日2026」喺啱啱過去嘅星期日(22/3)順利舉行，希望進一步推廣防災應急知識。立法會主席李慧琼、九龍城民政專員蔣志豪、立法會議員楊永杰、九龍城區防火委員會主席樊敏華、消防處九龍中區指揮官林素華、消防處署理助理救護總長（九龍中及東）馮裕基等嘉賓蒞臨主禮，與市民共度一個既精彩又有意義嘅周日。
當日活動內容非常豐富，典禮除咗邀請到消防處儀仗隊進行展示國旗及區旗儀式外，仲有消防及救護青年團嘅防火短劇及精彩表演，為活動打開序幕。現場人流絡繹不絕，最吸引目光嘅當然係消防設備展覽及救援示範，其中搜救同機械狗示範，畀大家親眼見證到專業隊伍嘅效率同融合科技嘅發展。另外，當然唔少得消防及救護制服穿着體驗同埋迷你消防車及救護車乘坐體驗，畀小朋友一嘗成為消防員及救護員嘅滋味。
大會除咗喺場內擺放唔同嘅攤位遊戲外，更邀請屋宇署、機電工程署、馬頭角社區客廳及基督教家庭服務中心設置攤位，為市民提供各項實用資訊。各個以防災應急為主題嘅攤位遊戲亦寓教於樂，希望市民玩遊戲放鬆之餘，亦能更深入了解消防安全知識。
九龍城區防火委員會將繼續積極推動防火教育，務求將消防安全及防災應急信息傳遍區內每個角落，與市民攜手締造安全美好嘅社區。
@ 