@ 
每年農曆三月廿三日都係天后寶誕，呢項香港非物質文化遺產，絕對係荃灣社區嘅年度盛事！今年荃灣民政處、荃灣區區議員及各社區領袖繼續全力支持區內兩大鄉事委員會，一連多日係區內舉行精彩慶祝活動！
荃灣鄉事委員會：精彩劇目笑聲傳「荃」城
由 5 月 6 日起一連四日，慶祝活動遍佈荃灣區。尋日（9/5），喺荃灣天后廟花園盛大舉行咗壓軸重頭戲——頒旗典禮。
荃灣民政專員區家盛、中聯辦新界工作部副處長吳家浩、荃灣警區指揮官羅家康、馬灣鄉事委員會主席陳崇業、青衣鄉事委員會主席陳志榮及多個政府部門代表一同擔任主禮嘉賓。現場劇團上演風趣幽默嘅《獅吼記》同埋其他精彩劇目，吸引大批街坊駐足欣賞，現場充滿笑聲同掌聲，氣氛熱鬧！
馬灣鄉事委員會：水陸居民同賀誕
喺馬灣，今年嘅慶祝活動移師到珀欣路足球場舉行，由 5 月 6 -10 日一連五日為島上居民帶嚟連場精彩演出。
寶誕當晚，荃灣民政專員區家盛、中聯辦新界工作部副處長吳家浩、馬灣鄉事委員會主席陳崇業、荃灣鄉事委員會主席邱錦平及各政府部門代表亦到場主禮，向參演老倌致送錦旗以表謝意。錦昇輝劇團更演出經典名劇《帝女花》，台下掌聲不絕，大家一齊度過咗個充滿文化氣息嘅晚上！
