@ 
荃灣「天橋之城」最近悄悄換上活力新裝，以全新面貌同大家見面！ 講起荃灣，又點少得美食？荃灣一向匯聚多元化美食，無論係地道街頭小食、熱辣辣又惹味嘅特色米線，定係人氣爆燈嘅特色餐廳，都深受街坊同旅客歡迎！
為咗將獨特嘅荃灣美食文化發揚光大，荃灣各界協會、荃灣商會、香港工商總會荃灣分會及香港荃灣工商業聯合會攜手合辦，再加上荃灣民政處同荃灣區議會協辦，並獲華懋集團全力支持，一齊喺人來人往嘅荃灣大河道天橋，精心打造「嚐‧遊荃灣」美食文化長廊！期望透過活化天橋空間，宣傳荃灣地道美食文化之餘，同步推動地區經濟發展。
今次天橋兩旁展示咗多幅以地道美食為主題嘅精美插畫，宛如一幅豐富嘅荃灣美食地圖！畫作完美捕捉咗荃灣不同角落嘅獨有風味——由大河道同路德圍嘅馳名小食食街、西樓角路同眾安街充滿人情味嘅小店餐飲，去到充滿大排檔鑊氣嘅香車街，以至保留住懷舊平民小食特色嘅鱟地坊！每一幅作品都展現出荃灣新舊交融、百花齊放嘅地區特色。繽紛奪目嘅設計，將各條街道香氣四溢嘅美食延伸至天橋之上，為大家帶嚟具吸引力嘅新鮮視覺體驗。
大家經過天橋嘅時候，不妨放慢腳步細心欣賞，發掘隱藏喺荃灣各個角落嘅美食。
無論你係住喺附近嘅街坊，定係專程入嚟覓食嘅遊客，都無任歡迎你到訪！快啲約埋親朋戚友，行天橋影靚相，展開美食探索之旅，親身感受荃灣獨有嘅社區魅力啦！
大家嚟到荃灣又最鍾意食啲咩？即刻留言分享吓啦！
