@ 
深水埗文藝協會今個星期五、六、日，一連三日（15 - 17/5）喺荔枝角社區會堂舉辦「時光雜貨店懷舊古風物品展覽」，帶大家一齊欣賞懷舊古物，重拾昔日情懷！
展覽以「雜貨店」為主題，展品包括1910年嘅3D立體鏡、六十年代巴士車票、膠片放映機、圓形打字機等。同場亦設有懷舊遊戲區，可以試玩豆袋、波子、竹籤等特色玩具，大人小朋友都玩得非常投入。大會仲準備咗經典懷舊小食糖蔥餅畀大家品嚐，分享甜蜜回憶。
活動尋日（15/5）舉行開幕典禮，中聯辦九龍工作部處長胡明智及深水埗民政助理專員陳樂桐都有出席支持。
深水埗民政處會繼續聯同地區團體為居民舉辦唔同類型嘅特色活動，連結街坊鄰里，攜手共建溫馨和諧嘅社區。
展覽展出到今個周日，喜愛懷舊古物嘅朋友萬勿錯過，一齊回顧往日生活點滴，探索古物背後嘅動人故事。
時光雜貨店懷舊古風物品展覽(免費入場)
- 5月16日(六) 10:00-21:00
- 5月17日(日) 10:00-18:00
- 地點：荔枝角社區會堂
