@ 
元朗區關愛隊一直提供多元化關愛服務，致力為市民排憂解難。就好似水邊關愛隊提供輪椅維修同借用服務，至今幫咗唔少老友記同有需要人士。呢班朋友都表示，服務切實照顧到佢哋喺缺乏輪椅使用期間嘅出行需要。
關愛隊透過自身廣泛網絡，凝聚社區資源，不時都會收到有心人士捐贈二手輪椅。輪椅經過檢驗、消毒及清潔後，會提供畀有需要人士借用。關愛隊更會喺合適嘅情況提供簡單維修服務，確保受助人嘅日常生活唔會因輪椅損壞而受影響，減少生活不便。
兩個星期前，水邊關愛隊收到一宗緊急求助。一位坐輪椅嘅伯伯喺街上因輪椅前輪脫落而返唔到屋企。關愛隊收到消息後，立即趕往現場了解情況。義工初步評估後，輪椅需要一段時間先可以修復，就即刻安排另一部輪椅借畀伯伯以解燃眉之急，等佢可以順利返屋企同按時去醫院覆診。
關愛隊義工之後又好快咁為伯伯維修輪椅。有市民見到關愛隊能迅速幫助到求助者，都大讚關愛隊急民所急，如及時雨為有需要人士解難釋困。
民生無小事，元朗區39隊關愛隊發揮社區互愛嘅精神，深入了解居民各方面嘅需要，隨時都準備就緒，急市民所急，將關愛帶畀每一位區內居民。
