@ 
9/5農曆三月廿三日，係一年一度「天后寶誕」嘅大日子，亦係期待已久嘅元朗盛事 。元朗區屏山鄉同十八鄉分別舉行大型賀誕活動，祈求天后娘娘保佑 國泰民安 、社區 風調雨順 。今年嘅慶祝活動氣氛格外熱鬧 、場面壯觀 ，慶典仲吸引咗大批市民及遊客擔定凳仔 ，沿途欣賞 盛大嘅巡遊表演 。
《十八鄉篇》
十八鄉天后寶誕嘅「丁財兩旺會景巡遊」今年特別引人注目 ，吸引共36隊來自各 花炮會、 龍獅 隊伍、地區團體及政府部門組成嘅盛大巡遊隊伍 參加。簡單而隆重嘅典禮喺朗藝徑舉行，由民政及青年事務局局長麥美娟、新界鄉議局主席劉業強、港區全國人大代表沈豪傑、十八鄕鄉委會主席程振明等蒞臨主禮 。所有隊伍都施展渾身解數 ，穿上七彩繽紛 嘅制服，將傳統嘅英歌舞、麒麟及 龍獅表演等糅合創意，為市民帶嚟精彩嘅大型巡遊節目 。
巡遊隊伍由崇正新村三喜堂被喻為「丁財兩旺炮」嘅「第三炮 」打響頭炮。當中，最受矚目當然係新界鄉議局為慶祝100周年而特別製作嘅9米高巨型花炮。同場仲有元朗警區為咗提升 市民防騙意識 而創作嘅「18222防騙炮」、土拓署元朗南新發展區加入咗「工程獅 」元素嘅花炮。現場吸引咗好多市民圍觀及打卡 ，場面熱鬧。大家都充分感受 到元朗傳統文化嘅 獨特魅力。
此外，元朗民政專員馬富威、元朗地政專員陳樂健及元朗警區指揮官梁仲文亦喺大樹下天后古廟，一齊為「抬神輿」及「抽花炮」儀式擔任主禮嘉賓。象徵「丁財兩旺」嘅第三炮，今年由水蕉老圍奪得 ，實在可喜可賀 。參與活動嘅巡遊隊伍同村民都誠心祈求 天后福蔭 香港同元朗，祝願祖國繁榮昌盛 ，百業興旺 。
《屏山鄉篇》
今年「屏山鄉鄉事委員會天后寶誕巡遊」 ，共有11支隊伍參加。大隊由東頭工業區遊樂場浩浩蕩蕩 出發到「鯉魚山天后廟」 ，沿途以 金龍醒獅 助慶 ，與眾同樂 ，展現鄉村傳統文化嘅承傳 。
屏山鄉鄉委會主席鄧志強聯同元朗民政專員馬富威、元朗警區指揮官梁仲文、元朗地政專員陳樂健、元朗區福利專員石陳麗樺、元朗區康樂事務經理林子健，以及元朗區環境衞生總監郭明幹一齊主持參拜儀式，祈求 天后娘娘保佑元朗百業興旺 、 丁財兩旺 。
@ 