@ 
中西區民政處聯同中西區防火委員會、香港消防處 Hong Kong Fire Services Department 喺8至9月期間合辦咗5班嘅消防安全大使訓練班暨心肺復甦法及自動心臟除顫器課程，向區內居民推廣防火安全信息以及基本急救知識。
1) 中西區消防安全大使訓練班 (3班)
課程傳授學員一般火警成因、應對手法及預防措施等，亦畀佢哋有機會學習使用滅火筒同消防喉轆，體驗滅火過程。課程除咗有區內本地居民參加，亦有菲律賓籍同印尼籍家庭傭工報名參與。佢哋完成課程再順利通過考試後，都獲委任為消防安全大使，齊齊喺社區協助推廣防火信息。
2) 心肺復甦法及自動心臟除顫器課程 (2班)
對於拯救心臟驟停嘅患者，每遲1分鐘為佢進行除顫電擊，存活率便會減少百分之7至10。越早進行除顫器急救，會大大提升生存機會。課程畀學員掌握心臟驟停急救法及使用除顫器，日後喺緊急情況下都可以學以致用，從而提升患者嘅存活率。中西區關愛隊隊員亦有響應呼籲齊齊報名上堂，裝備好自己，為中西區提供更好嘅服務。
中西區民政處及中西區防火委員會未來會繼續同香港消防處合作舉辦活動，喺社區加強推廣防火應急嘅信息，為街坊生命安全提供後盾。
