@ 
南區一向主動積極、躬身垂範，向市民致力推廣維護國家安全信息，共同維護「國安港安，家安民安」嘅精神。繼上次區議會總動員率先參觀國家安全展覽廳後，南區區議員同防火及滅罪委員會主席亦踴躍參加咗11月18日嘅「國家安全教育地區導師培訓班」，成為首批畢業嘅地區導師。作為地區導師，佢哋要喺一年內向最少30名人士分享維護國家安全嘅信息。
12月4日係國家憲法日，首批7位導師特別出席由南區民政處舉辦嘅「國安•家好」維護國家安全分享會。佢哋即時學以致用，由淺入深為超過300名區內中學師生介紹「總體國家安全觀」以及「國家安全領域」等重要元素，令大家快速而準確咁理解國家安全嘅組成同重要性。
每位導師喺各自領域都有傑出成就，對社區貢獻良多，今次亦都花咗好多心思去準備呢場分享會。南區關愛隊雖然遲啲先至有機會上培訓班成為導師，但都派代表出席，支持咁有意義嘅分享會，未來亦會一齊喺區內推廣維護國安信息。
南區民政助理專員陳芷羚亦有到場支持一班導師，佢喺致辭時提到期望分享會可以有效提升大家維護國安嘅意識同埋自覺性，呼籲同學仔要協力宣傳，以維護國家安全為己任。
今日嘅分享會只係南區地區導師嘅首次宣講活動，嚟緊南區會有更多地區人士加入導師行列，亦會以各種途徑宣揚維護國安嘅信息同意識。
