@ 
潔淨嘅海水對保護維港至關重要，亦係區議員同市民關注嘅議題。1月15日，中西區民政專員兼區議會主席梁子琪就帶領中西區區議員與渠務署署長莫永昌會面，並參觀全港污水處理量最大、甚至規模上亦喺世界上都係數一數二嘅昂船洲污水處理廠，了解中西區嘅污水處理同渠務情況。
渠務署嘅一眾工程師向議員介紹咗廠房嘅日常工作同中西區嘅渠務狀況。唔講唔知，作為淨化海港計劃嘅最重要一環，原來嚟自維港兩岸地區嘅污水都會經海底管道輸送至昂船洲污水處理廠，進行消毒處理後先會排出維港。除咗位於2號主泵房嘅展覽區，議員亦參觀咗主控制室，了解控制室人員點樣24小時監控各個處理污水嘅程序。議員之後參觀綠化天台，俯瞰污水處理廠嘅設施，聽取工程師深入介紹整個污水處理嘅過程。議員參觀泵房時都踴躍提出咗唔少寶貴意見。
喺同渠務署交流過後，中西區區議會更了解署方喺防洪同清理淤塞排水系統方面擔當嘅重要角色，亦有助議員日後就渠務及污水處理事宜共獻良策，與政府攜手共建美好中西區！
