@ 
全運會將係11月舉行，多項群眾賽事活動選拔賽正喺社區進行得如火如荼！早前3月30日，大批運動健兒齊集灣仔水上運動及康樂主題區，參加由中國香港遙控帆船總會、香港模型科技促進會同藍星行動合辦，灣仔民政處支持嘅「第十五屆全國運動會 群眾賽事活動 航海、車輛模型項目 遙控帆船 香港區運動員代表甄選賽」。
雖然當日天氣寒冷，但無阻一眾運動員對遙控帆船運動嘅熱情，佢哋喺比賽場區內大展身手，施展精湛嘅操控技術 ，全力爭奪代表香港區參加全運會嘅資格，在場觀眾都被運動員嘅卓越技術同拼搏精神感染，落力為佢哋吶喊打氣！
立法會議員邵家輝、李鎮強、中聯辦港島工作部代表同一眾政府部門代表都有到場支持，一齊為比賽選手打氣同進行頒獎 。經過近百名選手激烈嘅比拼後，最後有6位運動員成功脫穎而出，將代表香港參加今屆全運會遙控帆船嘅項目。一齊恭喜比賽嘅優勝者，繼續為選手們加油打氣，期待佢哋年底喺全運會嘅精彩表現，爭取佳績！
