@ 
屯門區青年社區建設委員會同屯門區青年發展及公民教育委員會新一屆任期已經喺今年4月1日開始咗喇！兩個青年委員會今屆都加入咗好多年輕嘅新面孔 ，委員嘅平均年齡32歲，最年輕嘅只有16歲，當中包括嚟自第八期青年委員自薦計劃獲甄選嘅年輕人，仲有幾位現正就讀屯門區中學、有志服務社區嘅青年委員添 。
屯門民政專員關可臨出席兩個青年委員會首次會議時，感謝委員投放私人時間參與屯門區青年委員會嘅工作 ，而民政處亦會繼續同委員加強互動 ，就地區嘅工程、青年發展及公民教育等議題吸納委員嘅意見，以及舉辦多元化嘅青年活動，攜手推動地區青年工作 。今年稍後，兩個青年委員會亦會合力協助籌辦夜市活動嘅其中一個攤位，為屯門區注入年輕人嘅創意同埋活力 ！
而除咗新一屆青年委員會開齋外，參加咗上年度「成功有約」法國及摩納哥交流團嘅學員 ，就趁機會喺屯門區青年發展及公民教育委員會嘅會議上作總結，向委員匯報 佢哋喺交流團學習到嘅新知識 同所見所聞，亦表示對國家喺國際舞台發揮重大影響力感到非常自豪 ！
