@ 
法治建設辦公室在社交平台表示：今年律政司再次同好拍檔善導會合作，喺歷史建築前北九龍裁判法院 舉辦進階課程 - 模擬法庭活動。
培訓日
上週六(7月26日)，我哋邀請到資深大律師Martin同埋高級檢控官Kelvin ，為80名學員(包括首次以crossover形式參與嘅廉政公署菁英誠信領袖 )詳細講解刑事審訊原則、控辯雙方嘅角色、主問、盤問和覆問環節嘅要點。
我哋仲同善導會一齊精心上演一場模擬庭審嘅demo，特意加入常見嘅錯誤，例如頻繁打斷證人作供、主問嘅時候問引導性問題等。學員都好優秀，可以指出全部錯處。
之後，學員分組由檢控官、私人執業大律師及律師指導，仔細分析模擬案件，分配角色。
審訊日
喺剛剛過去嘅星期六，學員無懼暴雨，上演三場精彩嘅法庭攻防戰。
繼上年飾演17歲被告之後，律政司司長林定國資深大律師再次向難度挑戰，演活19歲大學校草 ，以網絡暴力受害者證人喺模擬法庭作供。學員表現非常專業，條理清晰進行各項審訊環節，冇被司長嚇親！
我哋嘅法官陣容更加係Pro Max配置，分別有我哋法治教育督導委員會嘅終審法院陳兆愷法官、區域法院李慶年法官, 仲有Vinci資深大律師。首次庭審，就得到一班星級法官加持，仲親自分享訟辯技巧，學員嘅起點可謂非常高！
正如律政司司長 分享，學員喺活動中親身感受程序公義，認識到被告的陳述權同聆聽技巧嘅重要性，喺日常生活中都用得着。
恭喜由星級法官評審選出嘅最佳律師和最佳證人，你哋超高水平嘅表現，令人眼前一亮！ 我哋亦衷心感謝風雨不改到場擔任陪審員嘅法治教育督導委員會譚雪欣律師和工作小組成員蔡德昇先生！
嚟緊星期六，仲有兩場模擬審訊，繼續我哋嘅法治教育之旅 。同樣有神秘嘉賓和星級法官團。請大家繼續支持！
